Ang halos adlaw-adlaw nga power-interruption sa service area sang Central Negros Electric Cooperative (CENECO) ang bangud sa tuman nga kainit sang tiyempo karon kasubong man ang sobra nga demand sang kuryente, suno sa management sini.
Sa interview sang DYHB kay CENECO General Manager Atty. Arnel Lapore, iya ginpahayag nga madamo na sang mga linya nga ila namonitor nga nagaka sunog ukon nagabaga tuga sang overloaded nga transformers.
Ini bangud sa pagsaka sang demand suno kay Lapore diin halos tanan nga mga panimalay, madamo na sang appliances nga gina usar kaangay sang refrigerators kag electricfan agud mabulong lang ang kainiton nga ila mabatyagan.
Ang scheduled power interruption sini lamang nga weekend amo ang gintalana sang CENECO agud hugton ang mga insulators kag pakaayuhon ang mga protective device.
Sa karon, padayon ang pag scan sang CENECO sa mga lugar nga sakop sini agud ila man ma identify ang mga hotspot areas ukon mga lugar nga masami gid gina brown out.
Naka red-alert man ang CENECO kada peaking hours ukon las 10 sang aga, 2PM, kag 6-7 PM diin masami gid nagakabrown-out.
Ang Negros Electric Power Corporation (NEPC) ang magabulig man sa CENECO pinaagi sa pagpadala sang ila technical team kag pagpagamit sang pila nila ka equipment agud mapahagan-hagan kag ma solusyunan ang masami nga pag brown-out.
