BACOLOD CITY- Nagpahayag ang mga Drivers kag operators sang traditional jeep nga kabutigan lamang ang ginsiling ni Atty. Salvador Altura, OIC Regional Director LTFRB Region 6, nga may bastante sa gihapon nga salakyan ang mga commuters sa pihak nga madamo ang wala nagpa-consolidate nga PUV operators sa Bacolod City.
Sa interview sang DYHB kay Rudy Catedral, Presidente sang transport group nga Bacolod Alliance of Commuters Operators and Drivers Inc. (BACOD), ginpahayag sini nga madamo sang mga commuters ang nag-antos sa kabulayan magsakay sa ila pag-untat pagbyahe, gani nagapakita lamang ini sang kakulangan sang salakyan sa ciudad sang Bacolod.
Dugang pa ni Catedral, luyag nila ipakita kon ano kadako ang epekto sa bahin sang mga commuters kon wala nagabiyahe ang masobra isa ka libo nga mga traditional jeepney sa ciudad.
Siling pa sini, sa ila pag-untat pasada nagalaum sila nga makita man sang gobyerno ang amo nga problema kag paboran ang mga drivers maextend pa ang consolidation.
