Nagresign ang deputy officer-in-charge sang Bacolod Traffic Authority Office (BTAO) Jose Antonio Robello epektibo sa Mayo 10 sini nga tuig.
Suno kay City Legal Officer Atty. Romeo Carlos Ting Jr. nga nagtender sang iya resignation si Robello sa City Administrator’s Office nagligad nga semana.
Ginpahayag ni Atty. Ting nga wala siya nakahibalo sang rason sa pagbiya sa BTAO ni Robello sa diin iya naman ini personal nga desisyon.
Nahibalu-an nga si Robello ang isa sa mga signatories sang kontrobersyal nga quota memo nga ginpa-gwa ni BTAO OIC Patrick Lacson.
Sa text message ni Lacson, iya naman gindayaw ang passion kag dedikasyon sa trabaho ni Robello sa diin iya ginatingwa-an nga mahaylo ang desisyon sang iya deputy OIC.
Samtang, sa separado nga text message ni Robello sa isa ka katapo sang City Hall Reporters, iya ginsiling nga maga-leave without pay ini tubtob sa bulan sang Hunyo bangud magabakasyon kaupod sang iya pamilya sa Amerika.
Sang ginpa-clarify kay Robello kon nag-resign ini ukon nag-leave lang sa trabaho, ang iya sabat,”Amo lang na ang ihambal ko ah. Leave ko Asta June”.
