BACOLOD CITY- Ginapatihan nadala sa emosyon ang isa hubog nga tumalan-aw sang Hda. Carmen Talent Show kadungan sang ila gina-selebrar nga kapiyestahan sa lugar nga nasakupan sang Barangay Granada ciudad sang Bacolod, sadtong las-9 sang gab-i, Sabado, Mayo 4.
Base sa interview sang DYHB kay Police Captain Portia Nillosan, Station Commander sang Bacolod Police Station 5, nagpadulong sa ila estasyon ang Purok President sang Hda. Carmen agod ireklamo si Allan Fernandez batok sa iya pagtapungol sa duha ka contestants sa amo nga kompetisyon.
Santo sa pagpangusisa sang kapulisan sa insidente, naga-perform sang drama ang isa ka babaye kag lalaki kun sa diin ila gina-portray ang isa ka kabuhi sang Overseas Filipino Worker (OFW) nga ginasakit sang iya amo.
Samtang naga perform and duha, hinali sila gin-atake ni Fernandez kag ginpang-tapungol. Nakaagom sang pilas sa likod ang babaye kag sa ulo naman ang pilas sang lalaki. Nahibaluan nga madamo na may nagareklamo sa kay Fernandez bangod siya ang palamaoy sa lugar.
