Yara na sa luwas nga kahimtangan ang anom ka mga sakay sang naglugdang nga motorbanca sa baybayon nga sakop sang Silay City matapos sila ang na-rescue sang mga katapo sang Philippine Coast Guard, Domingo sang aga, Mayo 12.
Gilayon gindala sa Coast Guard Sub-station Bacolod sanday Joan Infante, 37-anyos; Arnel Sevilla, 25-anyos; Jondle Sevilla, 24-anyos; Liberato Sevilla, 58-anyos; Ricky Sevilla, 30-anyos; kag Elmer Tiongzon, 39-anyos.
Suno kay PCG Station Northern Negros Occidental Commander Paterno Belarmino Jr., nagbiya sa Catabla Baybay, Barangay Zone 3, Talisay City ang mga mananagat las-4:00 kaina sang kaagahon agud magpangisda.
Apang samtang nagapangisda sa baybayon nga sakop na sang Silay City, hinali nga ginhampak sang mabaskog nga hangin kag balod ang ila nga sakayan nga gintunaan sang pagkahukas sang outrigger sini kag pagkadula sang balanse rason nga ginsulod na sang tubig ang ila nga motor banca.
Nasiplatan sang naglabay nga tanker ship ang mga mananagat nga nagautaw-utaw sa dagat nga may kapin four nautical miles ang kalayuon gikan sa higad-baybayon kag gilayon nagpadala sang distress call sa CSGNNOC headquarters sa Barangay Banago.
Gin-rescue ang mga ini sang tugboat sang 618th Squadron sang Philippine Coast Guard Auxiliary (PCGA), sa pagpamuno ni AUX CDR Ricky Malayo, kag gindala sa Bredco Port upod sa ila nga sakayan.
