BACOLOD CITY- Nagpatigayon sang duha ka adlaw nga pre-health summit ang ciudad sang Bacolod sugod kahapon nga adlaw, Mayo 13 tubtob Mayo 14, ini ang may kaangtanan sa plano ni Bacolod City Mayor Albee Benitez nga magpahamtang sa Super Health Center sa ciudad.
Base sa pahayag ni Dr. Eric Saratan, Special Advicer sang Bacolod City on Health nga ang objective sang amo nga summit nga mahibaluan kun ano ang mga masami nga problema nga gina-atubang sa tagsa ka mga ospital kag pasyente sa ciudad.
Sa inisyal nga survey, ang pila ka masami nga problema sa tagsa ka mga ospital amo ang kakulangan sa mga hospital beds, nurses, kag ang proseso sa pagpa-transfer sang mga pasyente sa pampubliko nga ospital nagikan sa pribado.
Pinaagi sa paghibalo sang mga problema, amo ang paghibalo sang solusyon kag mangin kalidad ang serbisyo sa mga ospital.
Ini ang pila ka mga tikang nga gin-himo sang ciudad agod masuguran ang Super Health Center nga tuyo ni Mayor Albee nga ipahamtang sa mga strategic areas sa ciudad.
Ang pre-health summit ang isa man sa preparasyon nga mangin pulido ang pagpatigayon sang Heath Summit sa Hulyo 11.
