PROVINCIAL CAPITOL – Ginahangkat sang pamuno sang Philippine Army sa Negros Occidental ang Commission on Human Rights nga kondenahon ang serye sang pagpamatay sang mga sibilyan sa probinsiya.
Ginpahayag ni 303rd Infantry Brigade Philippine Army Commander Brigadier General Orlando Edralin nga karon nga gina-imbestigahan sang CHR ang pagpamatay, luyag nila nga lantawon sang ahensiya sa “bigger perspective” ang gintawag sini nga “senseless killings”.
Nahibaluan nga magapatigayon sang moto propio investigation ang CHR sa kamatayon sang walo ka mga sibilyan sa sulod lamang sang isa ka bulan kun sa diin pito sa mga biktima ang ginaalegar sang NPA nga mga espiya ukon asset sang militar.
Nagapati man si Edralin nga kabahin lamang sang propaganda sang NPA ang pagpamatay agud ipakita nga yara pa ang ila presensiya kag may yara pa sila sang ikasarang apang sa pagkamatuod, wala na sila makahibalo kun diin sila makadto.
