Lalaki ginlampusan-patay gamit ang metal scissor cutter sa Brgy. Handumanan ciudad sang Bacolod
BACOLOD CITY- Patay ang isa ka lalaki matapos nga ginlampusan sang metal scissor cutter sa bahin sang iya dalunggan sa Zone 12 Barangay Handumanan, sadtong Miyerkules nga adlaw, Mayo 15.
Ang biktima ginkilala nga si Richie Castro, 46-anyos, isa ka construction worker, una nga asawa ni Avelyn Castro samtang ang suspetsado amo si Genny “Tiloy” Medel, nangin ka live-in partner ni Avelyn apang sila ang nagbulagay naman.
Base sa interview sang DYHB kay Police Captain Lelanie Lagoting, Station Commander sang Police Station 10, ginpatawag ni Avelyn si Genny natuhoy sa ila nga bata apang sa ila nga pag-istoryahanay may wala ini sila sang pag-inchindihanay kag nagtuga sang ila kinagamo.
Gintawag sang subang nga bata ni Avelyn si Ritchie bangod sa pagkabalaka nga sakiton ang iya iloy nga nagabusong.
Sa pag-abot ni Richie, nagtapangulay ini sila ni Genny kag gilayon nga nagkuha ini sang metal scissor cutter kag ginlampos sa biktima.
Gilayon nga gindala si Richie sa ospital apang gindeklarar nga dead on arrival bangod sa hemorrhage kag pagbanog sang iya nga utok nga gintunaan sang iya kamatayon.
Dugang pa ni PCapt. Lagoting, nafile na kahapon nga adlaw ang kaso nga murder batok sa suspetsado.
