MOISES PADILLA- Padayon ang pagpatigayon sang 62nd Infantry Battalion sang clearing operation matapos nga nagluntad ang duha ka asod-asod nga engkwentro sa Sitio Inangaw, Brgy. Quintin Remo, banwa sang Moises Padilla, adlaw sang Martes, Mayo 21.
Base sa interview sang DYHB kay Lieutenant Colonel J-jay Javines, Spokesperson sang 3rd Infantry Division, samtang nagapatigayon sang combat operation ang army pasado las-7 kahapon sang aga agud i-verify ang report sang mga residente sa lugar angut sa presensya sang masobra pito ka mga armado, kag didto nagluntad ang amo nga engkwentro.
Ginsundan man sa gilayon sang ikaduha nga engkwentro nga naglawig sa kapin 10 ka minuto. Nagresulta ang engkwentro sa pagkapatay ni Richard Dela Peña, alias Rocky, ginapatihan isa ka remnant sang Central Negros Front 1 kag residente sa amo nga lugar.
Nahibaluan nga si Dela Peña, ang isa sa mga likod sa pagpatay kay Albert Goles sadton Abril 24, sini nga tuig, nangin imbolbado man ini sa pila ka mga crimen kag paglapas sa kinamatarong sang isa ka indibidwal.
Nakumpiskar man sang militar ang M16 A1 rifle, isa ka bandolier, M16 rifle kag pila ka mga subversive documents sa encounter site. Dugang pa ni Lt. Col. Javines, may report nga yara lamang sa palibot sang amo nga Barangay ang mga remnants sang mga katapo sang rebelde.
Apang sa statement sang Leonardo Panaligan Command-New People’s Army peke ang nasambit nga engkwentro kag ang military ang nagluthang sa isa ka mangunguma.
