BACOLOD CITY- Dakop ang tatlo ka mga kalalakinhan matapos nga makompiskaran sang apat ka inug bulang nga manok kag anom ka mga bisaya sa GK Village, Barangay Handumanan ciudad sang Bacolod, kaina pasado las-2 sang kaagahon, Mayo 24.
Ang ginkawatan ginkilala nga si Rogelio Amihan, 37-anyos, residente sang Prk. Ceres, samtang ang mga suspetsado amo nanday Wilbert Cardeñas, 18 anyos sang Purok Sto. Niño, kaupod niya ang 17-anyos kag 15-anyos nga mga lalaki sang Purok Saturn sang amo nga Barangay.
Base sa interview sang DYHB kay Police Captain Lelanie Lagoting, Station Commander sang Police Station 10, nga nakabaton sila sang impormasyon nagikan sa concerned citizen nga may nakita ini nga mga kabataan nga iya gin-suspetsuhan nga nagpangawat sa lugar.
Gilayon nga nagresponde ang mga katapo sang kapulisan kag didto nakuha sa ila ang manok nga nasulod sa sako kag ginputos sa t-shirt.
Nahibaluan nga igabaligya kuntani sang mga suspetsado sa Libertad Public Market ang amo nga manok agod may kwarta sila para sa ginapatigayon nga kapiyestahan sa Purok Saturn.
Ginalantaw sa karun sang mga kapulisan ang posible nga sila man ang sa likod sa mga pagpangawat sang mga manok sa lugar. Nagdesisyon si Amihan nga indi na magpasaka sang kaso batok sa mga suspetsado apang mangin serbe ini nga leksyon para sa ila.
