BACOLOD CITY- Suspetsado sa pagpamatay ang gwardiya nga gintiro patay sa dalan Locsin sa downtown area ciudad sang Bacolod, Sabado sang gab-i, Hunyo 1.
Ang biktima ginkilala nga si Benjie Flores Fajardo, 30 anyos kag residente sang Barangay Banago, Bacolod City. Base sa interview sang DYHB kay Police Major Elmer Bonilla, Station Commander sang Police Station 1, nga ginsiling sa iloy mismo sang biktima nga sadtong nakaligad nga mga tinuig, si Fajardo ang may nakontra kag iya ini ginluthang nga nangin rason sang kamatayon sini, apang wala na ginfile ang kaso batok sa iya.
Sa karun, jsa ini sa mga ginalantaw nga anggulo sang mga kapulisan, nga nagdumot ang pamilya sang biktima sadto, amo nga ginbalusan si Fajardo.
Madumduman sadtong Sabado, pauli na kuntani ang biktima nagikan sa iya nga trabaho kag hinali gintiro ini siya sang wala pa makilal-an nga suspetsado. Ginhingagaw pa dala sa ospital si Fajardo apang gindeklarar nga dead on arrival matapos sang igo sang bala sa iya lawas kag sa iya nga ulo.
Nahibaluan nga nakabaton sang pagpamahog sa kabuhi ang gwardiya sa diin ila ini sa karon nga padalman. Narecover naman sa crime scene ang anum ka mga basiyo kag 2 ka deformed slug sang 9mm caliver pistol.
Ginbalikan man sang Police Station 1 ang Locsin Streets sa Barangay 37 subong nga aga agud ma-check ang mga CCTV footages sa lugar.
Sa karon padayon pa ang imbestigasyon sang kapulisan natuhoy sa insidente.
