Nagdeklarar naman sang State of Calamity ang banwa sang La Castellana kahapon matapos ang phreatic eruptions sang Mount Canlaon.
Ini ang gindeklarar ni Mayor Rhumyla Nicor-Mangilimutan matapos nag-convene ang Municipality Disaster Risk Reduction Management Office (MDRRMO) kahapon, Hunyo 4.
Sa karon malapit na sa isa ka libo ang residente sa banwa sang La Castellana nga nag-evacuate bangud sang phreatic eruption sang Bulkan Kanlaon.
Santo sa record sang Department of Social Welfare and Development (DSWD), may yara na sang 232 families, 940 individuals ang yara karon sa duha ka mga evacuation sites sa banwa. Walo ka pamilya ang nag-evacuate halin sa Brgy. Robles; 152 sa Cabagna-an; 508 sa Mansalanao; 104 sa Sag-ang; 110 sa Biak na Bato; 33 sa Masulog kag 34 naman sa Cabacungan.
Kahapon, nagpadala na sang bulig ang ciudad sang Kabankalan sa pagpamuno ni Mayor Benjie Miranda subong man si 5th District Board Member Anton Occeño. Samtang, nagdeklarar man kahapon sang State of Calamity ang Canlaon City, Negros Oriental.
Ini matapos nga ginrekomendar sang Canlaon City Disaster Risk Reduction and Management Council sa Canlaon City Council ang pagdeklarar sa kabug-usan nga ciudad.
Sa ginpatigayon nga emergency meeting sang Local DRRMC, ginpahayag sang alkalde sang ciudad nga si Mayor Jose Chabasco Cardenas nga nagdangat na sa 23,622 ang apektado nga mga pumuluyo nagikan sa Barangay Masulog, Pula, Linuthangan, Malaiba, kag Lumapao sa nagluntad nga insidente.
