May tatlo ka mga persona nga ginpick-up sa ciudad santo sa pahayag sang Bago City Police Station.
Sa interview sang DYHB sa imbestigador sang Bago City Police Station nga si Police Master Sergeant Erwin Jamandre, nagkadto sa ila ang pamilya sang tatlo ka mga indibidwal matapos nga may nakita nga utod nga kamot sang tawo sa volcanic soil nga gindala sa Phase 3, South Bay Subdivision, Purok Tongoy, Brgy. Sampinit, Bago City, sang Hunyo 3. Ang volcanic soil ang nagikan sa Brgy. Alangilan Bacolod City.
Sa una nga report sang DYHB, may pamilya nga nagpadulong sa Police Station 5 sa ciudad sang Bacolod agod mangusisa angot sa utod nga kamot. Suno kay Captain Portia Nillosan, commander sang Police Station 5, nagpahayag ang pamilya nga may himata sila nga duha ka lalaki kag isa ka babayi ang nadula.
Ang nasambit nga pamilya ang ginhambalan ni Captain Nillosan nga magpangusisa sa Bago City Police Station 5 angot sa utod nga kamot. Suno kay PMSGT Jamandre, nagpahayag ang pamilya nga Hunyo 2, ginpick-up ang tatlo sang armado nga mga lalaki sa Purok Arao, Vista Alegre kag ginpasakay ang mga ini sa Avanza nga salakyan.
Ang tatlo ka missing ang ginkilala nga sanday Lorebelle Antiquerra, Joem Villacoer kag Jonel Nangan santo sa pahayag sang pamilya sa Bago CPS.
Suno pa kay Jamandre, nagpa-blotter ang pamilya sa Police Station 7 sa Bacolod apang sang gin-check sang DYHB ang commander nga si Police Captain Andy Ofalia, wala ini sang ideya sa insidente.
