PROVINCIAL CAPITOL – Gindesignar ni Governor Eugenio Jose Lacson si Provincial Legal Officer Atty. Alberto Nellas Jr. bilang acting provincial administrator sumugod kahapon nga adlaw, Hunyo 10.
Si Nellas ang temporaryo nga magatal-os kay Atty. Rayfrando Diaz II samtang gina-serbehan sini ang anom ka bulan nga suspension nga gindagag sang Office of the Ombudsman. Kadungan ni Diaz nga nasuspendir si Atty. Chery Sheil Valenzuela nga abogado man sang probinsiya.
Suno kay Governor Lacson, nag-file sang motion for reconsideration sanday Diaz kag Valenzuela apang samtang wala pa sang desisyon ang Ombudsman, nagboluntad ang duha nga ila na lamang sugdan ang pagserbe sang suspension.
Kumpiyansa naman si Lacson nga maka-operate sa gihapon sang matalunsay ang Capitloi bangud naplastar naman ang Sistema sang provincial government.
Sa madumduman, sanday Diaz kag Valenzuela ang ginkasuhan ni Atty. Roxenne Sumanting sadtong 2019 matapos wala naghatag sang legal assistance ukon representation ang provincial government sa banwa sang Binalbagan may angut sa expropriation case nga gin-file mismo sang banwa sa Regional Trial Court sa Himamaylan.
Ang reklamo ang nagasiling nga isa ka conflict of interest ang pagpresentar nanday Diaz kag Valenzuela bilang counsel sang JLL Agriculture and Development, isa sa mga defendant sang expropriation case samtang incumbent Provincial Administrator kag executive assistant II pa ang mga ini.
Ang expropriation case ang para kuntani masolusyunan ang pagbinaha sa banwa.
