BACOLOD CITY- Balik na ang tubod sang tubig sa Purok Masinadyahon, Barangay Bata ciudad sang Bacolod sa sulod sang 24-oras.
Base sa interview sang DYHB kay Armando Constantino residente sa lugar nga nagsugod ang tubod sang tubig sa ila lugar sadtong tinalikdan nga Lunes, Hunyo 3.
Indi na kaangay sang tinalikdan nga mga semana nga may pagbrown-out sang tubig sa sulod sang masobra lima ka oras sa isa ka adlaw. Apang may higko pa nga dala ang tubig nga nagwa sa ila gripo.
Ang Barangay Bata kaupod sang Mandalagan ang mga lugar nga nabenepisyohan sa dugang nga 2 million liters per day nga water supply sang PrimeWater-BACIWA nagikan sa transmission project sa Forbes Hill padulong dalan Circumferential kag Airport-Silay.
