PROVINCIAL CAPITOL – Nagapahanumdom ang Provincial Health Office sa publiko nga likawan ang balatian nga Dengue ilabi na subong nga nagsugod na ang tig-ululan.
Ginpahayag ni Provincial Health Officer Dr. Girlie Pinongan, nagataas ang kaso sang dengue tagsa magtig-ululan bangud sang mga natipon nga ubig kun sa diin nagapangitlog ang mga lamok nga may dala nga dengue.
Sa sini, iya ginapanugyan ang pagpanglimpyo sa palibot kag pag-ula sang stagnant water.
Nahibaluan nga ikatatlo ang Negros Occidental sa bilog nga Western Visayas sa may pinakamadamo nga kaso sang dengue humalin Enero 1 tubtob Hunyo 8, nga naglab-ot sa 519 kun sa diin tatlo ang nagkalamatay.
