Ginkalipay ni Bacolod City Mayor Albee Benitez ang kapin P2 nga pagnubo sang kuryente sang Central Negros Electric Cooperative (CENECO) sini nga bulan sang Hunyo.
Sa statement nga ginpagwa ni Atty. Caesar Distrito, spokesperson ni Mayor Albee nga resulta ini sang pagtinguha sang alkalde nga pirmahan na sang Energy Regulatory Commission (ERC) ang joint petition nga gin-file sang CENECO kag Energy Development Corporation (EDC).
Madumduman nga madamo sang mga konsumidor ang nagareklamo bangud sa mataas nga bili sang kuryente nakaligad nga Mayo diin yara sa P15 ang per kilowatt-hour sini.
Kahapon lang, nagpahibalo ang CENECO nga yara karon sa P12.7 per kilowatt-hour ang bili sang kuryente sini nga Hunyo.
Abiso lang sang Alkalde sa mga konsumidor, nga mag kini-kini lang sa gihapon sa paggamit sang kuryente agud malikawan ang mataas nga bill sang kuryente.
Dugang pa sini nga nagalaum siya magnubo pa gid ang kuryente sa bulan sang Hulyo kag sa masunod pa nga mga billing months.
Ini matapos ma aprubahan ang kontrata sang CENECO kag EDC diin maga-supply ini sang 20 megawatt nga base load power kasubong man ang temporary suspension sang pagpasaka sang bili sang kuryente sa Wholesale Electricity Spot Market (WESM) bangud sa red alert status nga gindeklarar sang National Grid Corporation of the Philippines (NGCP).
