BACOLOD CITY-Gina-respeto sang mga nagabyahe tradisyunal ang plano nga transport holiday sang mga modernized jeep groups and operators sa Bacolod.
Sa interview sang DYHB kay Rudy Catedral, presidente sang BACOD-Manibela, ginpahayag sini nga ang mga operators sang modernized jeeps ang biktima man sang palpak nga programa sang gobyerno kag kon may yara man sila sang dapat basulon, amo ang Land Transportation Franchising and Regulatory Board (LTFRB).
Ginpasalig ni Catedral nga kon magpatigayon gid man sang transport holiday ang mga modernized jeeps, masarangan sang traditional jeeps nga pun-an ang ruta nga indi nila maserbisyuhan.
Suno pa kay Catedral, 15 percent lamang ang nagpa-consolidate kag nagsulod sa modernization program sa Bacolod samtang ang mga unconsolidated ang yara pa sa 50 percent.
Sa nahibaluan nga ang Bacolod Modernized Jeepney Transport Association ang nagapanawagan sa LTRFB nga sila naman, ang pamatian.
Nagapanawagan ang grupo sa LTFRB sang total implementation sang modernization program sa diin dapat dakpon na ang mga unconsolidated traditional jeeps.
Nagaplano ang grupo nga kon wala sang dakpanay sang unconsolidated units, sila naman ang magapatigayon sang transport strike sa Hulyo.
