Nasurpresa man apang gina-welcome sang presidente sang Bacolod City Public School Teacher’s Federation (BCPSTF) ang pag-resign ni Vice President Sara Duterte bilang secretary sang Department of Education (DepEd).
Sa interview sang DYHB kay Richard Gelangre, ginpahayag sini nga wala man nila ginahingyo ang resignation ni Duterte apang madamo sila sang nakita nga inconsistencies sa mga panindugan sang bise presidente kag DepEd secretary sa pila ka mga issues sa pungsod.
Suno kay Gelangre, inconsistent si Duterte sa vision sang DepEd nga mag-produce sang Filipinos nga nagapalangga sang iya pungsod bangud nga sirado ang bibig sini sa tension sa West Philippine Sea (WPS).
Inconsistent man ini sa commitment sang DepEd para sa child protection bangud nga mas naga-apin pa ini kay Pastor Apollo Quiboloy nga gina-akusaran sang child abuse.
Suno pa kay Gelangre, inconsistent man si Duterte sa pag-promote sang honesty sang DepEd matapos nga gingasto sang opisina sini ang P120 million nga intelligence fund sa sulod lamang sang 11 dias.
Dugang pa ni Gelangre, wala man sang statement ang bise presidente sa isyu sang Philippine Offshore Gaming Operations (POGO) nga mas nagdamo sa pungsod sa tion anay sang iya amay nga si former president Rodrigo Duterte.
Mas maayo suno kay Gelangre nga nag-una na lang resign sa pwesto si Duterte sangsa ginpahalin pa ini. Nagalaom naman si Gelangre nga ang masunod nga DepEd secretary ang magahalin mismo sa ila nga hanay.
