BACOLOD CITY- No comment si Police Major Junji Liba, ang anay Bacolod Traffic Authority Office (BTAO) head natuhoy sa kaso nga ginpasaka batok sa iya ni Bacolod Councilor Al Victor Espino nga obstruction of justice kag dugang nga kaso angot sa kurapsiyon sa gina-alegar pag-gamit sang gasolina sang asawa kag bata sini sa idalum sang account sang BTAO.
Base sa interview sang DYHB kay PMaj. Liba, handa ini nga magpangatubang sa ano man nga kaso nga iga-file batok sa iya kag iya na lamang ini pagasabton sa proper venue ukon sa korte.
Wala ideya si Liba kun ano ang rason sa likod sini kag kun ini bala ang may kaangtanan sa pagpang-personal sang konsehal batok sa iya. Madumduman nagsugod ang amo nga isyu sadtong Oktubre 18 sang tinalikdan nga tuig matapos ang gina-alegar pagpanulong ni Espino sa opisina sang BTAO, kun sa diin ini ang nagpamuyayaw kag ginpakitaan sang ginapatihan armas ang building guard nga si Abner Salvallon.
Apang sa karun nagatrabaho bilang Acting Chief si PMaj. Liba sa Bacolod City Police Office- City Plans and Programs Unit.
