Nag-isturyahanay na sa una nga kahigayunan ang isa ka miyembro sang Philippine Army kag amay sini nga tumandok sang Kabankalan City pinaagi sa DYHB Sentro Serbisyo program kahapon, Hunyo 20.
Si Private First Class Jethro Ian Bangyon, 23 anyos ang wala na sang may ginkilala nga amay humalin sang tatlo pa lang ini ka bulan.
Setyembre 2002 sang ginbun-ag ni Wilma Bangayon si Jethro kag binulan pa lang ini, nagbulagay na ang mga ginkinan sini matapos nagpauli si Wilma sa Kalinga kag wala na ginsugtan pa sang iya ginikanan nga magbalik kay Felix sa Manila.
Sa una nga interview sang DYHB sa army, ginpahayag sini nga nahibaluan niya lang nga naga hingalan Felix Labajo ang iya amay kag residente sang ciudad sang Kabankalan. Kahapon lamang, pareho ginlab-ot sang DYHB ang mag-amay kag diri nagkumustahanay sila live sa kahanginan.
Nagpangayo man sang pasensya si Felix bangud malawig sila wala nagkitaay sang iya nga anak. Gilayon man siya ginpatawad ni Jethro kag nagsiling nga wala siya nagtanom sang kaakig sa iya amay.
Naistoryahan man sang duha nga maga-meet ang mga ini tion nga tugutan makapauli si Jethro halin sa iya duty sa Occidental Mindoro sini nga Agosto ukon Setyembre.
Handum naman ni Felix nga makaabot pa pauli si Jethro sa kaadlawan niya sini nga Agosto 10 bilang ginakabig niya ini nga pinakadako nga regalo nga iya mabaton. Madumduman nga minuto lang ang nakaligad sang ginpanawagan ni Jethro kun sin-o ang nakakilala sa iya amay, gilayon nagpakig-angot si barangay kagawad Jeron Abada sang barangay Tagucon, Kabankalan City sa sentro serbisyo kag diri iya ginpahibalo nga may kilala siya nga Felix Labajo sa ila barangay.
Kag diri, nagtinguha man si kagawad Abada kuha sang contact ni Felix agud ihatag sa DYHB kag para ma malab-ot na ang iya anak.
Tuman man ang pagpasalamat sang mag-amay sa kagawad kag ilabi na sa DYHB RMN Bacolod bangud matapos ang masobra duha ka dekada, nakaistoryahanay na sila kag natalana pa magkitaay.
