Nakuhaan sang pandesal nga may palaman nga shabu ang isa ka babaye nga magabisita kuntani sa iya nobyo nga napreso sa Kabankalan City Police Station, pasado las-2 sang hapon, adlaw sang Sabado, Hunyo 22.
Ang arestado ginkilala nga si Danica Garado, 20-anyos, kag residente sang Sitio Homesite , Brgy Camansi sa amo nga ciudad.
Base sa interview sang DYHB kay Police Major Joelan Vinson, Deputy Chief sang Kabankalan CPS, sa ila pag-tsekyar sa dala ni Garado para sa iya nga nobyo nga napreso nakita ang isa ka pandesal nga may giya sa tunga kag ini ang may unod nga ginapatihan shabu nga isa ka sachet nga ginabulubanta may kabug-aton nga isa ka gramo kag may standard drug price nga P6,800.
Dugang pa ni PMaj. Vinson, isa sa mga protocol sang mga kapulisan ang pag-tsekyar sang mga dala sang nagabisita sa ila mga himata nga napreso.
Nahibaluan nga ang nobyo sang arestado ang napreso bangod sa kaso nga illegal nga droga. Si Garado ang nahunong karun sa Kabankalan CPS para sa nagakaigo nga disposisyon.
