PROVINCIAL CAPITOL – Nagalab-ot sa 8,315 ka mga mangunguma kag mangingisda nga “severely affected” ukon tuman nga naapektuhan sang naglabay nga El Niño phenomenon ang magabaton sang ayuda sa idalom sang Presidential Assistance for Farmers, Fisherfolk, and Families (PAFFF).
Ginpahayag ni Presidential Communications Office (PCO) Assistant Secretary for Television Dale De Vera nga magabaton sang tag-P10,000 nga ayuda ang tagsa ka benepisyaryo ukon kabug-usan nga P83,150,000 balor sang assistance nga magahalin sa Office of the President.
As of broadcast time, may mga plano nga si Presidente Bongbong Marcos mismo ang magakari para sa ceremonial turnover sa maabot nga Hunyo 27, Huwebes, nga hiwaton sa football field sang University of Negros Occidental-Recoletos (UNO-R) sa Bacolod City.
Pagahatagan naman sang 30 ka adlaw ukon isa ka bulan ang mga alkalde nga i-distribute ang ayuda sa apektado nila nga mga pumuluyo kag magpasa sang report sa Office of the President.
Samtang, sa amo man nga adlaw, patigayunon ang ‘LAB for All’ Caravan, nga nagahatag sang libre nga laboratory services, nga proyekto naman ni First Lady Liza Araneta-Marcos.
