BACOLOD CITY- Nagdangat sa P600,000 ang ginabanta nga kahalitan sa pagkasunog sang 11 ka mga balay sa Purok Roadside, Brgy. Tangub, Bacolod City, las-3:07 sang hapon, Hunyo 26, 2024.
Santo sa report sang Bureau of Fire Protection (BFP) Bacolod, nagsugod ang kalayo sa puluy-an ni Silfa Nolasco.
Nagdangat sa anom ka balay ang totally damaged samtang lima naman ang partially damaged sa diin 11 man ka pamilya ang apektado.
Nagdangat sa second alarm ang sunog kag napalong ini las-3:45 sang hapon. Ang mga nasunugan nga pamilya ang gindala naman sa Rodolfo A. Medel Sr. Elementary School sa Brgy. Tangub.
Samtang isa mga nasunugan sang balay kag tyangge nga si Aldrin Galon ang nagsiling nga kapin sa P1 million ang nadula sa iya bangud sang sunog.
Suno kay Galon, puno sang stocks ang iya tyangge kag nalakip man sa sunog ang ila mga freezers kag cash nga savings.
