BACOLOD CITY- Malipayon nga nagbaton ang isa ka manug baligya sang punaw nagikan sa 8, 315 ka mga benebisyaryo nagikan sa probinsya sang Negros Occidental sang tig-P10,000 cash kag lima ka kilo nga bugas kadugangan sa pag-abot ni President Ferdinand “Bongbong” Marcos Jr. sa ciudad sang Bacolod, adlaw sang Huwebes, Hunyo 27.
Personal nga nagpadulong si PBBM sa ciudad agod igapanagtag ang bulig pinansiyal sa mga nangin apektado sang El Niño pinaagi sa Presidential Assistance to Farmers, Fisherfolks, and Families (PAFFF).
Base sa interview sang DYHB kay Helen Tolentino, isa ka fisherfolk nagikan sa Brgy. Banago, Bacolod City, dako ang iya kalipay kag pagpasalamat sa presidente kag Bacolod City Mayor Albee Benitez bangod isa siya sa maswerte nga nakabaton sang ayuda.
Nagpasalig si Tolentino nga paga-gamiton ang kwarta nga nabaton para ibulig sa iya mga kabataan kag dugang nga capital sa iya negosyo nga pagbaligya sang punaw.
