NEGROS ORIENTAL- Patay ang nagabusong sang pito ka bulan matapos nga mabungguan ang motorsiklo nga ginamaneho sang iya bana angkas ini siya kag ila nga bata sang L300 van sa Barangay Dungo-an, Manjuyod, Negros Oriental, aga sang Miyerkules, Hunyo 3.
Ang nagtaliwan ginkilala nga si Shogie Bajar, 30-anyos, nagabusong sang pito ka bulan, samtang ang nagamaneho sang motorsiklo amo ang iya bana nga si Judy Guateis, 40-anyos, kag angkas man ang bata nila nga naga-edad 9-anyos lunsay residente sa amo nga lugar.
Ang driver naman sang L300 van amo si Benedict John Apostolero, 41-anyos, kag residente sang Dumaguete sa amo nga probinsya. Base sa interview sang DYHB kay Police Staff Sergeant (PSSG) Lestersam Pancho, Investigator on Case sang Manjuyod Police Station, naga-usoy ang motorsiklo kag L300 van sa pareho nga direksyon sa National Road.
Apang ang motorsiklo ang yara sa outer lane samtang si Apostolero ang yara sa inner lane, apang nagpadulong si Apostolero sa dalan nga gina-usoy nanday Bajar bangod may nag-overtake sa pihak nga lane.
Bangod sa pagsaylo sang gina-usoy nga dalan ni Apostolero kag madasig ang pagmaneho, amo nga iya nasagaid ang motorsiklo rason sang pagtumba sini.
Ginhingagaw dala sa ospital ang mga sakay sa motorsiklo para sa nagakaigo nga pagbulong, apang si Bajar ang gindeklarar nga dead on arrival.
