WORLD NEWS- Ginlunsar sang Hezbollah ang masobra 200 ka mga missiles nga naga-target sa mga Israeli military site kasunod sa pagtaliwan sang isa nila ka senior commander sa Sur nga bahin sang Lebanon.
Suno sa Israel Defense Forces (IDF), ila ginabasol si Muhammed Neamah Naser, commander sang Aziz Unit sang Hezbollah sa pagdumala sa mga pagpang-atake antes kag pagkatapos sang mga pagpang-atake sang Hamas sa Gaza sadtong Oktubre 7 sang tinalikdan nga tuig.
Ginlaragway sang IDF nga si Naser ang kaangay ni Samu Taleb Abdullah, isa man ka Hezbollah commander, nga sa iya pagtaliwan sang tinalikdan nga bulan ang nag-trigger man sang kaangay sini nga pagpang-atake.
Ginpahayag sang Israeli military nga ila na-intercept ang pila ka mga missiles kag drones nga ginlunsar sang Hezbollah apang may pila ka bahin sa lugar ang nasunog, resulta sa pagpang-atake.
