Hatagan sang local government unit sang Bacolod sang 15-day extension ang mga tenants sa Manokan Country nga desidido magsaylo sa SM City property antes sila nga ipasira.
Sa interview sang DYHB kay Bacolod City Councilor Vladimir Gonzalez, ginpahayag sini nga nagpasugot na ang mga stall holders sang Manokan Country nga magasaylo sa ila temporaryo nga pwesto sa parking area sang SM sa atubang lamang sang Vendor’s Plaza agud mga masuguran na ang construction sang SM Prime Holdings Inc.
Sarang nga makabaligya ang mga vendors sa Manokan Country tubtob sa Hulyo 20 basta nga sila ang magapatunda sa ciudad nga magasaylo ang mga ini sa gintanyag nga lugar sang SM City para sa ila.
Sa karon nakahanda ang mga stall nga gin-preparar sang SM para sa mga tenants apang may mga pila pa ka mga problema nga dapat hikuton sa sulod sang 15 days kaangay sang kuryente kag tubig.
Nahibaluan nga nagahingyo kay Mayor Albee Benitez ang mga vendors kon pwede sa likod sang Bacolod City Government Center (BCGC) sila masaylo bagay nga wala man ginapamatukan sang alkalde.
Apang pagklaro ni Benitez, kon magsaylo gid man sila sa likod sang BCGC, may renta sila gihapon nga dapat bayaran sa tag-iya sang duta.
