PROVINCIAL CAPITOL – Gindagdagan sang ikaduha nga show cause order si Provincial Tourism Officer Cheryl Decena kag duha tubtob tatlo ka mga disbursement officers sa Provincial Treasurer’s Office.
Ginpahayag ni Provincial Legal Officer kag Acting Provincial Administrator Atty. Alberto Nellas Jr. nga ang panibag-o nga show cause order ang angot sa natukiban sa ginpatigayon nga audit nga wala nagasantu ang pirma sang 13 ka mga indibidwal sa payroll kag sa ID nga ila ginsumiter.
Sila ang kabahin sang mga drumbeaters nga ginkuha sang Provincial Government para sa isa ka okasyon sa Capitolio.
Sa inisyal nga impormasyon, kabahin sila sang Panaad sa Negros Festival tinalikdan nga Abril. Suno kay Nellas, nakapasa na sang sabat sanday Decena kag ang disbursement officers kag gina-finalize na lamang sang iya opisina ang resolusyon.
Ginklaro naman ni Atty. Nellas nga separado ini sa una nga show cause order kay Decena, nga may angot sa unliquidated cash advances sa Mambukal Resort sadtong nagapungko pa ini nga resort manager.
