DON SALVADOR BENEDICTO- Desidido na ang 18-anyos nga soltero nga indi na magpakig-uli sa 15-anyos nga dalaga matapos nga siya gintublukan sang gina-alegar pesticide sa banwa sang Don Salvador Benedicto.
Base sa eksklusibo nga interview sang DYHB sa soltero, sadtong Miyerkules, Hulyo 3, nagkitaay ini sila sang dalaga sa likod sang Health Care Center sang banwa, kag didto nagdesisyon ini siya nga makipag-bulag na apang indi ini mabaton sang dalaga.
Magahalin na kuntani ang soltero sa amo nga lugar bangod siya ang may trabaho pa, apang nag-ayo ang babaye nga maghakos sa iya sa ulihi nga kahigayunan. Sa paghakos ka dalaga sa iya hinali lang siya nga gin-turukan sa iya nga liog, amo nga naglain ang iya nga pamatyag kag nagpalaranuka.
Ginlaragway sang soltero ang dalaga nga suplada kag selosa amo nga siya ang makipag-bulag na. Nagkilalahay ang duha sa bulantihan kag naglawig ang relasyon sa sulod sang isa ka bulan.
Yara na sa maayo nga kahimtangan ang soltero kag na-discharge na sa ospital. Dugang pa sang magulang nga babaye sang biktima, indi sila boto sa dalaga para sa iya nga manghud bangod sa batasan sini nga ginapakita sa ila nga pamilya.
Apang sa karun may may inisyal na nga settlement ang pamilya sang duha sa amo nga insidente.
