SILAY CITY- Nagtanyag sang P25,000 nga padya si Silay City Mayor Joedith Gallego sa makatudlo sa mga nagkawat sang painting sang National Artist nga si Fernando Amorsolo nga naka-display sa Hofileña Heritage House and Museum sa ciudad sang Silay sadtong pasado las-10 sang aga, Hulyo 3.
Base sa interview sang DYHB kay Mayor Gallego, personal nga kwarta ang gintanyag niya nga padya sa kun sin-o ang positibo nga makahatag sang impormasyon kag makatudlo sa mga suspetsado sa pagkawat sang “Mango Harvesters” nga painting.
Santo sa pahayag ni Police Lieutenant Colonel Mark Anthony Darocca, hepe sang Silay City Police Station nga padayon ang ila imbestigasyon natuhoy sa amo nga insidente bangod nakita sa CCTV footage nga isa ka lalaki ang nagkuha sang painting kag may upod ini nga babaye sa iya nga pagwa sa museum.
Natrace ang mga nagkuha sang painting kag ini sila ang padulong sa ciudad sang Bacolod nga direksyon.
Nahibaluan nga kabahin sa private collection ang amo nga painting nga nagabili naman sang minilyon ka pesos.