BACOLOD CITY- Dakop ang Indian National nga may kaso nga pagpatay sa pungsod India pinaagi sa kampanya kontra wanted person sa paglapas sa Philippine Immigration Law, Commonwealth Act No. 613 sa isa ka subdivision sakop sang Barangay Taculing, ciudad sang Bacolod, las-7:40 sang gab-i, Hulyo 8.
Ang arestado ang ginkilala kay Joginder Geong alyas Joginder Geyong ukon Kant Gupta, 40-anyos, kag temporaryo nga naga-istar sa amo nga lugar.
Ginpangunahan sang mga katapo sang Bacolod City Police Station 6 sa pagpanguna ni Police Captain Dax Santillan ang amo nga operasyon kaupod sa pagsuporta sang FILD and CIT Bacolod of RIU6, Bacolod Marpsta, RMU 6, 605th COY of RMFB 6, kag FSU of Bureau of Immigration, ang amo nga operasyon.
Santo sa rekord sang Bacolod City Police Office, ginkabig nga “undesirable alien” ukon indi citizen sa pungsod Pilipinas si Geong kag ini siya ang nagpalagyo kag nagapanago sa pungsod bangod siya ang may kaso sa India. Nahibaluan nga si Geong ang may kaso kriminal sa India nga murder, attempted murder, extortion, robbery, kag isa sa makabig nga lider sa mga organisado nga crime syndicate.
Ginsentensiyahan ang akosado nga pagkapreso sa bilog niya nga kabuhi ukon life imprisonment bangod sa paglapas sa Arms Laws sa India. Ginagamit ni Geong ang peke nga pangalan nga Kant Gupta sa Pilipinas nga may Nepalese Passport. Yara sa kustodiya sang FSU, Bureau of Immigration ang akusado para sa nagakaigo nga disposisyon kag posible nga deportation.
