BACOLOD CITY- Ginklaro sang Bacolod Traffic and Transport Management Department (BTTMD) nga wala sila ga intra sa legal battle sa tunga sang Choret Corporation kag sa grupo ni Philip Burata nga ginpang-tow kag gin-impound ang walo ka mga unit sang modernize jeep sang tinalikdan nga Biyernes, Hulyo 5, sa dalan Araneta.
Base sa ginpahayag ni Patrick Lacson, OIC-Head sang BTTMD, naghingyo sang bulig ang mga opisyales sang Choret Corp. sa ila nga departamento kag nag-file sang letter of complaint batok kay Burata bangod nga yara sa iya ang 33 ka mga units sang PUJ bisan siya ang indi kabahin sang korporasyon kundi siya lamang ang ginhatagan sang kahigayunan nga mag-oversee sang mga units sa iya nga garahe nga gin-rentahan sang amo nga korporasyon.
Nahibaluan nga sumugod sadtong Setyembre 2023, wala na naka-remit sang tig-₱1,000 per unit kada adlaw si Burata sa korporasyon amo nga may pending case ini sila sa korte natuhoy sa carnapping nga gin-file sang korporasyon batok kay Burata.
Dugang pa ni Lacson, may mando na sa mga traffic enforcers nga isa sila sa mga dapat nga pagabantayan sa dalanon nga mga units bangod sila ang nagabiyahe nga wala sang city sticker ukon business permit.
Apang indi buot silingon nga sila ang ginpunterya sang BTTMD bangod gina-monitor man sang mga traffic enforcers ang mga PUJ nga kulang sa dokumento samtang nagabiyahe sa dalanon.
Naglapas ang grupo nanday Burata sa Bacolod City Ordinance No. 818 amo nga sila ang gin-tow kag tuyo sang BTTMD ang ikamaayo sang mga commuters natuhoy sa road safety.
Aminado ang BTTMD nga wala sila sang may na-issue nga citation ticket sa mga drivers sang walo ka mga PUJ unit antes ang pag-tow bangod nagpamalibad ang mga ini nga mag hatag sang ila nga mga driver’s license.
Ginpang-tow ang amo nga mga unit bangod ini ang naga-obstruct sa dalanon sang ini ang gina-alegar gin-abandonar sa lugar.
