Posible magsaka pa ang reward money para sa makatudlo sa nagkawat sang painting sang National Artist nga si Fernando Amorsolo nga naka-display sa Hofileña Heritage House and Museum sa ciudad sang Silay sadtong pasado las-10 sang aga, Hulyo 3.
Sa interview kay Mayor Joedith Gallego, ginpahayag sini nga posible may dugang nga pondo halin sa city government. Sa nahibaluan nga si Mayor Gallego ang nagtanyag na sang P25,000 nga padya halin mismo sa iya kaugalingon nga bulsa para sa makatudlo sang nagkawat sang “Mango Harvesters” nga painting.
Una na ginpahayag ni Police Lieutenant Colonel Mark Anthony Darocca, hepe sang Silay City Police Station nga padayon ang ila imbestigasyon natuhoy sa amo nga insidente bangod nakita sa CCTV footage nga isa ka lalaki ang nagkuha sang painting kag may upod ini nga babaye sa iya nga pagwa sa museum.
Na-trace ang mga nagkuha sang painting kag ini sila ang padulong sa ciudad sang Bacolod nga direksyon. Nahibaluan nga kabahin sa private collection ang amo nga painting.
