Nanindugan ang himata sang contractor nga gintiro-patay kahapon sa Purok Masagana, Barangay Sum-ag, Bacolod City nga indi utang ang motibo sa krimen kundi, work-related.
Ang biktima ang ginkilala kay Gregg Alvin Gelito, isa ka contractor kag residente sang Alunan Baybay, Barangay 35 diri sa ciudad sang Bacolod.
Sa exclusive nga interview sang DYHB sa himata sini, ginpahayag nga madamo na sang threats nga nabatunan ang biktima antis ini ginluthang.
Dugang pa, nahibaluan nga may mga akig sa iya bangud madamo ini sang mga na-deal nga dalagko nga projects, bilang masami ini nga lowest bidder.
Isa sa mga dako sini nga projects ang maga-umpisa na kun tani sa masunod nga bulan ang sa reclamation area.
Ini ang baliskad sa una na nga alegasyon nga may mga kautangan ang biktima rason nga ginpatay ini.
Base sa interview sang DYHB kay Police Captain Michael Tuburan, Station Commander sang Bacolod City Station 9, nadiskubrihan sang mga kapulisan nga may nagpa-blotter sadtong Hulyo 2022 kay Gelito sa Boracay, Aklan sa kaso nga estafa kag paglapas sa bouncing check law.
Nahibaluan man nga sadtong Enero 2024, nakabaton sang demand letter ang biktima sa isa ka construction supply bangod sa utang nga kapin P800,000.
Una na ginreport kahapon nga pagkatapos panyaga sang biktima kag upod sini nga driver sa isa ka talabahan, hana na kun tani ini magsulod sa passenger seat sang gintiro ini sang riding in tandem.
Tatlo ka lupok ang nabatian sang mga saksi sa lugar. Igo naman sa ulo ang biktima nga posible gintunaan sang iya kamatayon.
