Kabankalan City – Ginatinguhaan sang City Government sang Kabankalan nga mahimuan sang pamaagi agud liwat maagyan ang dalan sa Sitio Banga, Barangay Camingawan nga naglitik kasunod sang landslide.
Ginpahayag ni Kabankalan City Mayor Benjie Miranda nga ginpadala na sini ang mga katapo sang Engineering Department kag General Services Office sa lugar agud matun-an ang sitwasyon.
Suno sa alkalde, possible nga sadtong tig-ilinit, naglitik na ang duta kag karon nga nagsulod na ang tig-ululan, naghumok naman ang duta nga gintunaan sang landslide kag nagresulta sa pagkabuka sang dalan.
Nahibaluan nga ang dalan ang pakadto sa Barangay Carol-an nga sakop gihapon sang Kabankalan City.
Sa karon wala pa sang abiso ang ciudad agud mag-evacuate ang mga pumuluyo sa lugar.
[Photo by Mayor Benjie Miranda/Facebook]
