Pilason ang isa 39-anyos nga babayi matapos nga ginluthang pasado las-7:00 sang gab-i, Hulyo 19, sa Sitio Mambusao, Brgy Tabu, banwa sang Ilog.
Sa report sang Ilog Municipal Police Station, ginkilala ang biktima kay Gelly Frandesquer, 39-anyos, kag ang suspetsado ang ginkilala naman kay Eliezer Paul Pallares alyas “Bolly”, 35-anyos, kag lunsay mga pumuluyo sang nasambit nga lugar.
Sa inisyal nga imbestigasyon, ginpahayag sang biktima nga naga-inum ang suspetsado sa ila nga tupad balay sang hinali ini nagkadto sa ila puluy-an samtang may dala sang homemade 12-gauge shotgun ukon sulpak kag nagpalupok sa makaduha ka beses.
Ang biktima ang nakaangkon sang pilas sa likod nga bahin sang lawas kag gilayon man nga gindala sa Dr. Lorenzo D. Zayco District Hospital, sa ciudad sang Kabankalan, kag yara na sa estable nga kondisyon.
Samtang ang suspetsado ang padayon nga ginapangita sang Ilog PNP matapos ini nga nakapalagyo.
