Patay ang nagapautang sang kwarta sang ginluthang kahapon sang hapon sa Paglaum Street, Brgy. Villamonte, Bacolod City. Samtang ang gina-alegar suspek amo ang body guard sini nga iya man upod sa salakyan.
Ang biktima ginkilala nga si Jun Alaba, kag residente sang Brgy. Estefania, Bacolod City samtang ang suspek amo si Ronel Rafael, 34, kag tumandok sang General Luna, Toboso. Sa official blotter sang Police Station 4, nagluntad ang insidente, las-5:20 sang hapon, Hulyo 22.
Santo sa blotter, ang biktima ang naga-drive sang iya Isuzu MUX halin sa Homesite kag paglab-ot sa Paglaum Street, naglalisay sila sang suspek kag diri na ini ginluthang. Ang biktima ang gindala sang nagresponde nga personnel sang Police Station 4 sa Corazon Locsin Montelibano Memorial Regional Hospital.
Suno kay Police Capt. Francis Depasucat, hepe sang Police Station 4, sang ila naaresto ang suspek, ginpahayag sini nga may nagluthang sa biktima sa guwa sang ila ginasakyan. Apang suno kay Depasucat, wala sang nakita nga fired cartridges halin sa guwa sang salakyan kundi sa sulod.
Nahibaluan nga ang armas nga ginapahayag gingamit sang suspek sa pagluthang sa biktima, ginhaboy pa sini pila ka metros gikan sa salakyan.
