Handum sang tagsa ka mga ginikanan nga mapa-graduate sa kolehiyo ang ila mg kabataan agud makakita ang mga ini sang manami nga trabaho.
Isa ka lola sa Sagay City, Negros Occidental ang nangin inspirasyon sa kadam-an bangud ini ang magagraduate na sa kolehiyo sa edad nga 70.
Si Lucy Gonzaga ang isa ka proud 4Ps beneficiary kag nabuligan siya sang ini nga programa para lab-uton ang iya nga handum nga makatapos sang pag-eskwela apisar may edad na ini.
2012 sang nangin 4Ps beneficiary ang household ni Nanay Lucy matapos nga na-qualify ang iya tatlo ka mga apo sa idalom sang 4Ps monitoring.
Bangud masami naga-attend si Nanay Lucy sa Family Development Session (FDS), diri napinsaran niya nga magbalik eskwela kaupod ang iya mga apo.
Nahibaluan nga high school graduate lang si Nanay Lucy.
2019 sang nag-enroll ini sa Senior High School kag diri nabuligan siya sang programa sa iya mga galastuhon.
Naglabay ang pila ka tuig, nagdisider si Nanay Lucy nga magpadayon sa kolehiyo kag ginkuha sini ang kurso nga Bachelor of Science in Fisheries.
Apang sang 2023, nag untat ini sa iya pag-eskwela bangud sa problema pinansyal bangud nga nag graduate na sa programa nga 4Ps ang ila household, buot silingon wala na siya sang isustener sa iya pag-eskwela.
Apang sa bulig sang iya mga kabataan kag mga kilala, liwat nga nagpadayon si Nanay Lucy sa iya pag eskwela.
Sini nga Academic Year, nagapreparar na si Nanay Lucy para sa iya on-the-job training bilang requirement antis siya maka graduate.
