Terminated na ang tanan nga mga empleyado sang Central Negros Electric Cooperative (Ceneco), las-5 sang hapon, Hulyo 31, 2024. Ini matapos ginpirmahan na ni Presidente Ferdinand Marcos Jr. ang layi nga nagahatag sang prangkisa sa Negros Electric and Power Corporation nga amo na ang maga-takeover sang operasyon sang Ceneco.
Apang Business as usual ang sitwasyon sa diin maga-operate sa gihapon ang ila nga main office kag mga payment centers, online man ukon over the counter.
Ang operation sa kabilugan ang amat-amat na nga padalaganon sang Negros Power, sa ila opisina nga nahamtang sa Robinsons Supermarket sa Burgos Extension east area (unahan sang SSS East). Mga ₱6 million pesos ang pinakamataas nga makuha sang isa ka empleyado sang Ceneco nga may mataas nga position kag masobra 30 anyos na sa serbisyo.
Ini ang pahayag ni Atty. Arnel Lapore, ang General Manager sang Central Negros Electric Cooperative (Ceneco) sa interview sang DYHB Straight to the Point. Suno kay Lapore, ara sa mga 300% ang benepisyo sini nga makuha magluwas pa sa ₱100,000 pesos nga financial assistance.
Magluwas pa dira sa dugang 100% kada years of service kag ₱100,000 pesos nga financial assistance. Sa ₱2.4 billion pesos nga bayad sang NEPC, ₱1.3 billion na diri ang na-advance sa Ceneco sa diin ₱720 million diri ang magakadto sa mga empleyado. Ang iban naman ang ibalik man sa gobyerno sa iya sini investment sa kooperatiba kag internal borrowings.
