VICTORIAS CITY- Masobra 24-oras na nga missing ang isa ka manugpanagat sa ciudad sang Victorias matapos nga gina-alegar nahulog samtang natulugan sa fishing boat, kapin ala-una sang kaagahon, adlaw sang Sabado, Agosto 3.
Ang missing person ang ginkilala nga si Leodegario Brosas, 24-anyos, kag residente sang Barangay 6-A, Victorias City.
Base sa interview sang DYHB kay Philippine Coast Guard- Negros Occidental Commander Jansen Benjamin, ala-una sang kagaahon sang amo nga adlaw natalupangdan sang mga crew nga wala na si Brosas sa iya nga ginahigdaan samtang nagalayag sila sa bahin sang Baliguian Island, Concepcion kag ciudad sang Cadiz.
Gilayon nga nagpahibalo ang mga kaupdanan sang biktima sa tag-iya, kag gin-report ukon ginpa-rekord sa PCG ang amo nga hitabo.
Nahibaluan nga ang fishing boat ang may sakay nga anom ka crew lakip na si Brosas, kag posible nagakatulog kag nagahigda ang pila ka mga crew sang barko amo nga wala natalupangdan ang pagkahulog sang biktima.
Padayon pa ang search and rescue operation sang Philippine Coast Guard agod makita ang biktima.
Nagasul-ob ang biktima sang itom nga jacket kag short sang nagluntad ang insidente.
