BACOLOD CITY- Nagtaliwan ang Purok President sang Purok Kingfisher A, Barangay 16, ciudad sang Bacolod matapos nga nakaangkon sang paso sa lawas sa nagluntad nga sunog sa lugar, sadtong Agosto 1, kapin alas-2 sang kaagahon.
Ang biktima ang ginkilala nga si Alejandro Tiad, 50-anyos, kag residente sa amo nga lugar, kun sa diin nakaangkon sang thermal burn kag kabudlayan sa pag-ginahawa sang nagluntad ang sunog.
Ang amo nga impormasyon ang ginkompirmar sang Barangay 16 Sangguniang Kabataan pinaagi sa isa ka facebook post, sini nga adlaw sang Domingo, Agosto 4.
Base sa rekord sang Bureau of Fire Protection-Bacolod, nagresulta ang amo nga insidente sa pagkasunog sang 15 ka mga balay, kun sa diin napulo ang totally damage kag 5 ang partially damage, bangod sa nag-overheat nga ceiling fan.
