Magapatigayon sang panibag-o nga transport rally ang Bacolod Alliance for Commuters Operators and Drivers (BACOD) – MANIBELA sa ciudad sang Bacolod sa Agosto 14-16. Ini ang kadungan sang padayon nga pagduso sang grupo sang temporary suspension sang Public Utility Vehicle (PUV) Modernization Program.
Suno kay BACOD president Rudy Catedral, nangin madinalag-on ang ila nga transport rally kahapon nga adlaw sa diin kapin sa 500 ka traditional jeep units ang nakigbahin.
Ginalauman ni Catedral nga mas madamo nga mga units ang makigbahin sa Huwebes kag Byernes.
Nagapanindugan si Catedral nga wala sila nalingkang sa pagpamatok ni Presidente Bongbong Marcos Jr. sa proposal sang mga senador nga temporaryo i-suspend ang modernization program. Kumpyansa si Catedral sa 22 ka mga senador nga nagpirma sa resolusyon nga nagapanawagan sang temporary suspension sang programa.
Dugang pa ni Catedral, 27 porsyento lamang sang mga traditional jeep units sa Bacolod ang nag-consolidate kag 73 percent pa ang nabilin nga unconsolidated.
