Pilason ang isa ka barangay tanod matapos nga ginbuno mismo sang iya asawa sa Purok Narra, Barangay Tagukon, Kabankalan City bangud sang ginapahayag pangimon kag problema sa kapigaduhon. Nagluntad ang insidente las-5 sang hapon, Agosto 11, 2024.
Ginkilala ang biktima nga si Andy Bobon, 25-anyos samtang ang suspek amo ang iya asawa nga si Angie Bobon kag pareho ang duha nga nagatrabaho sa kampo sang tubo.
Suno kay Police Captain Sammy Gasataya, Deputy Chief for Administration sang Kabankalan City Police Station, naglalisay ang mag-asawa tubtob nga nagkuha ang suspek sang kutsilyo kag ginbuno ang biktima sa abaga. Nadala naman sa hospital ang biktima kag yara na sa estable nga kondisyon.
Samtang ang suspek nga asawa ang ginkustodiya sang kapulisan kag ginahulat kon magapasaka sang kaso ang bana. Kaso nga frustrated parricide ang posible ipasaka sa asawa kon magdesisyon ang bana. Ang mag-asawa ang may apat ka mga kabataan.
