“No where to be found” na ang ang step father ni Pearl Joy Galve sa sulod sang masobra isa na ka semana antes ini masapwan nga wala na sang kabuhi sadtong Agosto 14 sa Hacienda San Roque Barangay Cubay sa ciudad sang La Carlota.
Ang step father sang biktima ang ginkilala nga si Rene John Nacis, yara sa kapin 44-anyos ang edad kag nagapataya sang STL.
Suno sa eksklusibo nga pahayag ni alias Mikay sa DYHB nga pakaisa ni Galve, sadtong Hulyo 27, ginpalayas ni Jennifer ang iloy sang biktima, si Nacis bangod sa problema nga dala sini sa ila pamilya, kaangay na lamang sa masami sini nga paghampang sang billiard kag kakulangan sang pagsustento.
Apang wala ini naglayas, bangod tuyo sang step father nga kun maghalin ini siya sa ila nga balay, upod niya ang bata nila ni Jennifer nga lalaki.
Samtang sadtong Hulyo 29, gina-alegar nga nagkitaay pa ang biktima kag si Nacis sa atubang sang elementary school kun sa diin ginhatagan pa niya si Galve sang ₱50 para sa dugang nga balon, apang sa amo nga adlaw wala na makapauli ang biktima.
Ginpahayag ni Mikay nga nagbulig pa pangita si Nacis sa iya nga pakaisa matapos nga ini ang nadula, apang sadtong Agosto 6, hinali lang ini nadula kag ginapatihan ginkawat ang duha ka cellphone kag ₱2,000 nga kwarta ni Jennifer. Sa inisyal nga impormasyon nga nag-contact sa ila si Nacis kag nagpabalo nga siya ang yara na sa Cebu matapos nga siya ang ginpalayas sang iloy ni Galve.
Nagapati ang pila ka himata sang biktima nga si Nacis ang wala sa Cebu kag yari lamang ini diri sa ciudad sang Bacolod ukon sa probinsya sang Negros Occidental. Dugang pa ni Mikay, nakaagi pa-blotter ang iloy sang biktima batok kay Nacis bangod ini ang nadakpan niya nga nagagamit sang ginapatihan illegal nga druga.
