Nagdangat sa 222 ka mga wanted persons ang naaresto sa weeklong manhunt sang Police Regional Office (PRO) 6 nakaligad nga Agosto 5-11, 2024. Sa sini nga numero, 33 ang mga most wanted persons (MWP) samtang 189 naman ang other wanted persons.
Sa mga MWP, nagpanguna ang Iloilo Police Provincial Office (IPPO) sa pinakamadamo nga nadakpan nga nagadangat sa 13, ginasundan sang Negros Occidental Police Provincial Office (NOCPPO) – 9 kag Antique PPO nga may lima. Samtang ang Bacolod City Police Office kag Capiz PPO pareho nga may tag-duha kag tag-isa naman ang Aklan PPO kag Iloilo City Police Office.
Sa bahin naman sang mga other wanted persons, nagpanguna ang NOCPPO sa may pinakadamo nga nadakpan nga nagadangat sa 92 kag ginasundan sang IPPO nga may 28. Nagasunod diri ang Antique PPO nga may 22; BCPO nga may 13 kag ICPO nga may 10. Samtang ang Aklan PPO kag Capiz PPO ang pareho nga may tag-walo; Regional Mobile Force Battalion 6 nga may pito kag isa naman ang Guimaras PPO.
Ini ang resulta tanan sang 199 ka mga police operations sa bug-os nga Western Visayas sa nasambit nga petsa.
