Nagpakita na sa pamilya ang step father ni Pearl Joy Galve nga si Rene John Nacis, matapos nga nasapwan nga wala na sang kabuhi ang biktima sa Hacienda San Roque Barangay Cubay sa ciudad sang La Carlota sadtong Agosto 14.
Matapos ang kapin duha ka semana nga nadula si Nacis, siya ang nagpakita na apang may pagkahangawa sa iya nga seguridad matapos ang akusasyon batok sa iya nga siya ang may kahilabtanan sa pagpatay sa manak.
Suno sa pahayag ni Nacis sa DYHB, may personal sila nga problema sang iloy ni Pearl Joy nga si Jennifer Galve kaangay sang third party sa bahin ni Jennifer, amo nga siya ang nagpaliwa-liwa sa Ilo-ilo. Isa man sa nangin rason kun ngaa nagtuhaw na si Nacis, bangod nagselebrar sang kaadlawan ang ila nga bata ni Jennifer kahapon nga adlaw, Agosto 21.
Sa karun, si Nacis ang yara na sa isa ka lugar nga iya ginasaligan para sa iya personal nga seguridad sa mga tawo nga may kaakig sa iya bangod sa natabo. Kadungan sini, nanindugan si Nacis nga wala ini sang kahilabtanan sa pagpatay sa iya manak.
Suno pahayag ni Nacis sa DYHB, nagpadulong ini siya sa Iloilo antes masapwan nga wala na sang kabuhi ang manak sadtong Agosto 14 bangod sa problema nila sang live in partner nga si Jennifer Galve.
Gilayon man nga nagbalik sa ciudad sang Bacolod si Nacis sang iya nahibaluan nga nakita na si Pearl Joy apang wala ini siya sang kakusog nga magpakita bangod sa mga akusasyon batok sa iya nga siya ang may kahilabtanan sa pagpatay sa biktima. Wala man sang ihibalo si Nacis kun sino ang sa likod sa pagpatay sa iya manak, bangod sa iya nga bahin tinlo ang iya konsensiya sa amo nga krimen.
Dugang pa niya, palangga niya ang mga kabataan nila ni Jennifer kag indi niya mahimo ang mga akusasyon batok sa iya. Nagpangisog na nga magsabat sa amo nga akusasyon si Nacis agod maklaro sa publiko ang pangalan natuhoy sa natabo nga insidente.
