Sa panahon karon, mabudlay na kun mag-intra ka pa tinunto bangud sa isa mo lang ka sala nga gihu kag madakpan ka, panigurado mahuy-an ka gid.
Isa lang ka post sa social media sang screenshot sang convo, pictures ukon video nga kuha sang imo pagpanunto, panigurado ma-viral ka gid!
Ginsintensyahan sang tatlo ka bulan nga pagka preso ang isa ka lalaki sa Taiwan matapos sini madakpan nga nagapangerido ang iya nga asawa.
Imbes nga siya ang mapasaka kaso kontra sa iya asawa, nagbaliskad pa ang paya kag siya pa ang nag gwa nga malain.
Ini bangud nag-install sang hidden camera ang lalaki sa sulod sang ila balay para makakuha kun tani sang ebidensiya para pamatud-an ang pagpanglu-ib sang iya asawa.
Sa isa ka report sang Chinese media, natukiban nga ang mayor nga rason kun ngaa napriso si Fan amo bangud sa pag-expose sini sa iya naga-cheat nga asawa.
Tinuig na nga kasado ang mag-asawa kag may mga ka awaaan naman.
2022 sang nagsugod suspetso si Fan nga may “other man” ang iya nga asawa amo kun ngaa nagdisider ini nga magbutang sang camera sa idalom sang piano, sa living room kag sa computer nahamtang sa master bedroom.
Duha ka semana ang makaligad, diri napamatud-an ni Fan ang sekreto sang iya nga asawa matapos sini makita nga naga “labing-labing” ang iya asawa sa iban nga lalaki.
Bangud sini, gingamit ni Mr. Fan ang iya natipon nga ebidensiya para mag-file sang divorce.
Abi ni Fan nagdaug na ini, luwas sa iya ihibalo may ginatago man nga alas ang iya asawa.
Nagpadulong sa local police station ang babayi kag gin akusar si Fan sa pag-invade sini sa iya privacy pinaagi sa pag-install mga camera nga wala sang pagpahanugot halin sa iya.
Ang una nga mga explanation ni Fan ang wala na ginpadalman pa sang korte kag diri ginsintensyahan siya sang Taoyuan Court sang tatlo ka bulan nga pagkapreso bangud sang sekreto nga pag-film sa pribado nga aktibidad sang iban nga tawo.
Bangud sini, pila ka mga debate ang nagtuluhaw angut sa boundary sang “privacy” kag pagtipon ebidensiya naangut sa “adultery.”
