Mismo ang iloy ang nagbilin sang buhi nga lapsag nga babayi nga nasapwan sa Hacienda Guanzon, Brgy. Mansilingan, Bacolod City sini nga gab-i, Agosto 21, 2024.
Suno kay Police Captain Greeky Cayao, commander sang Police Station 7, mga las-6:30 sang gab-i sang nasapwan sang mga kabataan nga nagapangkuha damang ang lapsag sa kilid dalan. Ini ang nasapwan nga may lampin, diaper kag gatas. Matapos gin-report sa police station ang insidente, nagpalapit ang mga ginikanan sang lapsag.
Sang pag-usisa ni Captain Cayao sa iloy, ginpahayag sini nga iya gin-abandonar ang iya anak bangud nahadlok ini nga mahibaluan sang iya man nga iloy nga siya ang nagbun-ag. Apang suno kay Cayao, nakahibalo man ang ginikanan sang nasambit nga iloy nga siya ang nagabusong.
Ini naman ang ikaduha na nga anak nila sang iya nga live-in partner. Napamatud-an man sang mag live-in partner nga ila ang gin-abandonar nga anak bangud mismo ang nagpabata sa iloy ang nagkadto man sa police station.
Suno kay Cayao, kahapon lang ginbun-ag ang lapsag. Ang ginikanan sang bata ang residente man mismo sang Hacienda Guanzon
