Nagpadala na ang Department of the Interior and Local Government (DILG) sang kopya sang implementing rules and regulations (IRR) sang Negros Island Region Act sa mga katapo sang Technical Working Group para sa pag-aprobar sini.
Sa interview sang DYHB kay 6th District Congresswoman Mercedes Alvarez, ginpahayag sini nga ang mga katapo sang technical working group sang NIR ang may yara na sang kopya sang IRR agud lantawon ang mga amendments nga sarang liwatun apang nagalaum ang mamalidha nga aprobahan na ini.
Dugang pa ni Alvarez nga nagsapol na ang mga opisyales sang Negros Occidental, Negros Oriental, kag Siquijor angut sa IRR kag ang ginpadala sang DILG ang resulta sang ila nahisugtan sa deliberation.
Ginpahayag man sang mamalidha nga una nga plano amo ang maghiwat sang ceremonial signing apang bangud sa masako nga schedule bangud sa nagapadayon nga budget hearings sa Kongreso, ginpakamaayo nga wala na sang ceremonial signing sa IRR apang patigayunon ini pinaagi sa ad referendum.
Nalakip naman sa IRR ang ginaduso nga pagtukod sang satellite ukon extension offices sang tagsa ka regional office sang mga ahensya sang gobyerno agud mapalapit ang ila serbisyo sa pumuluyo. (INSERT VC Congresswoman Mercedes Alvarez)
